Şehîdên Roboskê

Di 28’ê meha borî de li ser “sînor” 28 ciwanên kurd bi êrîşa balafirên şer hatin parçekirin. Bêguman biryar li Enqere hatibû dayîn, diviya ev ciwan bên kuştin. Lê çima bi bombeyên nîvton, çima bi balafiran, ku bixwestan dikariyan bi çekên G1, G3 jî bikujin. Lewre kuştineke asayî jî ji bo Kurdan rewa nabînin, divê kuştina wan jî ji yên mayîn re bibe ibret. Xwestin Kurdan bitirsînin.
Dema em axaftina şahidên komkujiyê, ya gundiyan, ya fermandarê herêmê, rewşa heta niha û awayê komkujiyê tînin cem hev;
1) Bi salan e dewlet zane ku gundî hema hema her roj derbas dibin. Li ber çavên wan derbas dibin û roja berê gundî bi hêstirên xwe ve di ber wan re derbas bûne.
2) Berî ku balafir bombe bikin, leşkerên li pêşiya wan kemîn danîn li erebeyên xwe siwar bûne, ji wir dûr ketine.
3) Berî ku balafir êrîş bikin, hem gundiyên hatîn kuştin bixwe, hem ji gund bi telefonan fermandarê herêmê agahdar kirine.
4) Balafiran destpêkê bombeya ronahîkirinê avêtiye; ev jî bûye sedem ku tev li hev kom bibin û tev bên kuştin. Lewre eger destpêkê bombeyan biavjin, an bi çekên din li wan bireşînin, ji ber ku tev ne li cem hev in, wê evqas mirov nahatibûna kuştin. Ev komkujî wisa hatiye pîlankirin ku ne şahid bimînin ne nîşanek. Du sê kesên rizgar bûyîn tesadufî rizgar bûne. Bêguman eger şahid nemabûna wê dewletê ev komkujî bixista stûyê PKK’ê.
5) Xala herî girîng fermandar ji gundiyan re gotiye; ev cara dawî ye.
Pir baş tê fêmkirin ku ev pîlan ji aliyê AKP’ê û Fethullahiyan ve li gora stratejiyekê hatiye amadekirin û li gora wê biryar dane. Pirseke din; ji bo çi piştî komkujiyê hema hema rojek derbas bû, ne deng ji medyaya tirk hat, ne ji hikumetê, ne ji serokwezîrê tirk? Diyar e ku destpêkê xwestine kirasekî li komkujiya xwe bikin. Lê piştî ku dîtin wê nikaribin veşêrin, bê daxwaziya xwe gotin qezayeke operesyonî çêbûye. Hem di daxuyaniya fermandariya dewleta tirk, hem di axaftinên berdevkên hikumetê û Erdogan de, ne hestên mirovatiyê hebûn, ne jî xemgînî. Baweriya ku mirov digihiyê; di amadekirina vê komkujiyê de 2 pîlan hene:
Pîlana A:
Pîlana B:
Pîlana A wiha ye; eger şahid û nîşan nemana wê bixistan stûyê PKK’ê. Bêguman wê ev jî ji bo xwe bikiran sedemê êrîşên mezintir. Piştî ku pîlana A negirt, jixwe ya din amade bû:
1) Wê bi vê komkujiyê Kurdan biceribînin; eger bertekên pêwîst neyên dayîn wê komkujî li dû hev werin û bi vê rêbazê herêmê vala bikin.
2) Her ku diçe di nava Kurdan de hestên neteweyî xurt dibin û têkiliyên di navbera parçeyan de pêş dikevin. AKP bi vê komkujiyê hesab dike ku wê çûnhatina ser ‘sînor’ bide sekinandin.
3) Ji ber ku debara gelê herêmê li ser bazirganiya ‘sînor’e, wê bitirsin êdî derbas nebin.
4) Piştî ku çûnhatina ser ‘sînor’ bê rawestandin, du rê li pêşiya gelê herêmê dimînin; an wê ji neçarî bibin cerdevan, an wê bi dayîna hin pere bibin sîxur û ajan, an jî wê neçar bibin gundên xwe berdin, herêm vala bibe. Ku herêm vala bibe wê AKP bikare bi hêsanî her rengê çekên kîmyayî bi kar bîne.

Bu yazi 536 defa okundu.

<< Önceki || Sonraki >>