Şîlan OZHAN - STENBOL

Qeza Stenbolî Başakşehîr mehleya Guvercîntepe di goreya îdayan, Aykut Budak û Mazlûm Çoban semedê ke muzîk bi veng goşdarnayê ra polêsan dayê înan ro û girotêy binçiman. Budak û Çoban semedê ke ‘Gureyî sero memûrî ra cebîr kerdo’ ra amey girotiş. Goreya malbatî no neheqey qereqolî di dom kerdo ra dê mafê xo yê hiqûqî bigeyrê.
Her roj tewr bi tewr cayanê Tirkîyayî ra vengê îşkenceyî yenê. Na gam zî qeza Stenbolî Başakşehîrî ra ame. Goreya îdayan Mehleya Guvercîntepe yî îneya ke ravêra di bîyaşê îşkenceyî wina bîyo: “Roja îne saet dormeyê 13.30 di maşineyî zere di Meydana Guvercîntepe di Îrfan Akdenîz, Aykut Budak (20) û Mazlûm Çoban (21) maşineya ke aîdê Budakî di muzîka ke vengeke bi zêd goşdarnay. 2 polesî berê maşineyî yên ke akerdebîy bi linganê xo giroto û vato: “Bigê muzîkî” ra pey destê Budak û Çobanî pey ra kelepçe kerdêy ra pey ra nezdî 15 polêsan înan bi deqeyan ameyê derpkerdiş. Apeya polêsan înan berdê Mudireteya Ewleheya Başakşehîrî ya Guvercîntepeyî û ûca de zî no îşkence dom kerdo. Budak û Çobanî tîyara benê nêweşxaneyî. Rapora nêweşxaneyî di qetîyen qala darpkerdişanê polêsan nîyameyo kerdiş. Hetê bînî ra lingê polêsanê ke îşkence kerdo ra yewî qelişyayo û rapora giroto. 2 polêsî semedê ke Bulût û Çobanî ra gerekar bîyê ra înan veng day dadgeheyî vetîy Adlîyeya Cennetî. Dadgehî di semedê ke ‘Dema ke memûr gureyê xo kerdê ra bi polêsan kerdê cebîr kerdê ra’ amey girot û eşrawitê zîndanî.

‘EZ ZÎ ŞÊRÎ KOYAN?’
Pîyê Budakî, Erdogan Budakî ard ziwan ke hewna şoqa bîyayişî xo sero nêeşto û vat: “Ez roja îneyî ey saetan di keye di rakewtebîya. Mi ra xeber ame ke polêsan êrîşê lajê min kerdêy û giroto binçim. Dimara ez şîya Mudireteya Ewlekareya Başakşehîrî. Pîyê Mazlumî di şande amîrê polêsandi xeberî da. Gedey ma nezaretra amey. Rîyê Mazlumî semedê kê darp bîbî weremyabi. Çakê Aykutî zî zaf xirab bî, di Çakê ey zî gûnî top kerdebî. Mazlum û Aykut semedê kê muzîk goşdarnayo kewtê zîndan, sucê eyna çinêbi. Etya tenî lajê min ey muamele nêvîneno. Ey ke rojhilatî ra yê heme zilmê polêsan vînenê. Etya sucê ke bibo zî ca de îşkence kenê. Azadî, edalet çîno. Ey ke bi gedeyanê ma îşkence kenê, memurê dewletî nîyê, canî yê. Edalet ça yo? Ez zî şêrî koyan? Ez heq dana ey ke şîyê serê koyan. Etya edalet çino kî, etya di sekerê?”

‘POLÊSÎ RA DOST NÊBENO’
Budak îda kerd ke, 10 roj veroci polêsan lajê ey darp kerdo û eyna vat: “Wexto kê lajê min ra qal kerd, min vat polêsandi niqaş meke. ‘Kutikî ra post, polêsî ra dost nêvirazyeno.’ Homa kesî mekero qereqolan.”
Goreya vatişanê înan mahleyî di bi temamî 7 mobeseyî estêy ema qeydanê înan nêvetî orte û vat: “Goreya ma îşkence kerdêy. Ma dê hetanê AÎHMî bişêrê.” Maya Budakî Gulay Budakî ard ziwan ke dema ke berdê qereqolî lajê ey înan vato: “Mayê, ma ra warêtey bikerê dê ma zûrker bivejê.” Û ey ra pey se kerdê se kes nêzano.
Maya Çobanî Sehnaz Çoban zî vat: “Ma bi mudirê ewlekareya Guvercîntepeyî ra soz girot ke dê bi polêsanê ke gere kerdê wa gerekerdişê xo apeya bigê. Dê gedeyanê şima hetanê çarşemeyî azad bêrê veradayiş. Eger êy gereyê xo peya boncê, ma dê zî boncê. Eger nêoncê ma dê hetanê peynî pey doza xo bişêrê. Û ma dê gerekerdişê xo qetî apeya nêoncê.” DÎHA

Ev nûçe 315 car hate xwendin.
Yên pêsî || ên pistî >>

Nûçeyên Kirmanckî