Cenazeyê 6 endamên HPG’ê yên dixwestin li navçeya Giyadînê ya Agriyê li cem hev bên definkirin polîsan destûr neda û li gorisatanê êrîşî welatiyan kir. Lê ji ber ku polîs gefa ‘heke hûn cenazeyan li cihên cuda defin nekin em ê bi kepçeyan derxin û li cihên cuda defin bikin’ welatî cenazeyan ji cihên ku defin kiribûn derxistin û li cihên ku polîsan nîşan dan, defin kirin.
Cenazeyê 6 endamên HPG’ê yên ji rojhilatê Kurdistanê yên di 22 û 24’ê cotmehê de li Geliyê Tiyarê ya navçeya Çelê ya Colemêrgê bi çekên kîmyewî hatin qetilkirin ligel testa DNA’yê heya niha nedan malbatan.
Lê ji bo cenaze li navçeya Giyadînê ya Agiriyê bên defînkirin ji Meletiyê hatin girtin û ber bi Giyadînê ve bi rê xistin. Konvoya cenazeyan li ketina navçeyê ji aliyê polîs û leşkeran ve hate rewastandin. Cenazeyên endamên HPG’ê yên rojhilatê Kurdistanê Leyla Halîmî (Denîz Derya), Hasan Alî Pervîzî (Rejav Jîlemo), Gulale Yusufî (Dîlar Dilbirîn), Geylanî Reşîdî (Sîpan Cûdî), Sultan Alî Julîde (Zînar Xoy) û Kemal Muhammedî (Zana Kewê) yê ku di 4’ê mijdarê de li navçeya Dihê ya Sêrtê jiyana xwe ji dest da anîn navçeya Giyadînê ya Agiriyê.
6 cenaze li Goristana Navçeyê li cem hev hatin definkirin. Dema ku gor dihatin girtin hêzên çewîk ên polîsan û rayedarên walîtiyê hatin. Rayedaran ji malbatan re got ku ew nikarin cenazeyan li cem hev veşêrin û divê ji hev dûr bên definkirin.
Rayedaran û polîsan gefên ‘Hûn ê wan ji vir derxin. Heke hûn dernexin em ê bi kepçeyan derxin’ li malbatan xwarin. Li ser vê yekê di navbera malbat û kesên tevli merasîmê bûn û polîsan de rageşî derket. Parlamenterên BDP’ê Halîl Aksoy û Demîr Çelîk ketin navberê xwestin rageşiyê bi dawî bikin.
Dema ku welatiyan gor digirtin hêzên polîsan ketin goristanê û bi zorê welatî ji goristanê derxistin. Polîsan êrîşî girseyê kir û ji goristanê derxistin. Hêzên çewîk û tîmên taybet ketin goristanê û nûçegihanê DÎHA’yê jî ji herêmê derxistin.
Polîsan ji bo ku 6 cenaze ligel hev neyên definkirin bi ava şîd û copan êrişê girseyî kirin. Polîsan malbatên cenazeyan tehdit kir û diyar kirin ku heke cenazeyan ji cihên cuda defin nekin dê bi kepçeyan derbixin. Li ser vê yekê malbatan diyar kirin ku heta ku polîsên AKP’ê bi kepçeyan derbixin em ê bi destê xwe derbixin û cenazeyan bi peywirdarê goristanê derxistin û li cihên ku polîs nişan dan defin kirin. Jin diyar kirin ku zilmek wiha nehatiye dîtin. AGIRÎ - DÎHA

Ev nûçe 261 car hate xwendin.
Yên pêsî || ên pistî >>

Nûçeyên Nûçe