Perwer YAŞ - BRUKSEL

Di çarçoveya operasyonên li hemberî siyaseta kurdan di bin navê KCK’ê de tên meşandin de li Tirkiyeyê 38 rojnamegerên kurd û muxalîf hatin binçavkirin. Vê yekê di çapemeniya cîhanê û navneteweyî de ciheke berfireh girt. Ajansên navneteweyî yên navdar ên weke Reuters, AFP û AP cihek berfireh dan binçavkirinên rojnamegerên kurd. Her wiha li welatên cûda û di rojname û televîzyonên cûda de der barê van binçavkirinan de ev agahî hatin dayîn:
ALMANYA: Operasyona li hemberî rojnamegerên kurd û muxalîf, di ajansên nûçeyan, rojnameyên rojane û gelek kanalên televîzyonên alman de cihek berfireh girtin.
Çapemeniya alman nûçeyên spart ajnasên Reuters û AFP’ê. Kovara navdar a alman Spiegel sernûçeya ‘Li gelemperiya welat operasyon’, rojnameya Bild ‘Polîs rojnamegeran kom kir’ û rojnameya Junge Welt jî sernûçeya ‘Derbe li azadiya çapemeniyê ket’ bi kar anîn.
FRANSA: Di encama operasyonên li hemberî rojnamegerên kurd de, wênekêşê ajansa nûçeyan a Franseyê AFP’ê Mustafa Ozer jî hate binçavkirin û ev yek jî bû sedem ku zêdetir bala çapemeniya Fransayê bikişîne. AFP’ê nûçeyên binçavkirinê û çalakiya rojnamegeran a li Taksîmê, di wê gavê de ji aboneyên xwe re ragihand. Her wiha bal kişand ser daxuyaniya REHE’yê.
Ji kanalên nûçeyan ên navdar ên weltê France24, nûçeyê bi sernûçeya ‘Li Tirkiyeyê rojnameger têne binçavkirin’ belav kir. Televîzyon ragihand ku zêdetirî 70 rojnameger li Tirkiyeyê hatine girtin.
DYA: Herî zêde çapemeniya DYA û îngilîz cih da operasyona binçavkirina rojnamegerên kurd. Rojnameyên navdar ên DYA’yê, malperên wê û Radyoya Dengê Amerîkayê cihek berfireh da nûçeyê.
Rojnameya The New York Timesê ragihand ku operasyon ne tenê li hemberî çapemeniya kurdane, di heman demê de li hemberî çapemeniya muxalîfane jî û bal kişand ser bûyerên vê dawiyê li Tirkiyeyê diqewimin.
Rojname The New York Timesê nivîsand ku rayedarên tirk dibêjin ku dibe piştî mudaxeleyên leşkerî yên li hemberî Îran, Sûriyeyê û vekişîna leşkerên DYA’yê ji Iraqê, PKK herêmê ji bo manewrayê bi kar bîne.
ÎSPANYA: Ajansa Nûçeyan a Îspanyayê EFE’yê bi bîr xist ku operasyonên di bin navê KCK’ê de ji nû ve dest pê kirin û ev nûçeya ajansa îspanî di gelek malper û rojnameyên weltê de cih girt. Di nûçeyê de hate bibîrxistin ku di rapora YE’yê ya Tirkiyeyê de bal tê kişandin ku herî kêm 4 hezar kes di operasyonên di bin navê KCK’ê de têne meşandin de, hatine girtin. Rojnamegerên ji Tirkiyeyê ji ajansê re axivî û gotin; “Di demekê ku me digot dê zext kêm bibin, polîsan dîsa dest bi operasyonê kir.”
SWÎSRE: Ajansa nûçeyan a Swîsreyê SDA’yê jî nûçeyê spart ajansên AFP û Reutersê û bal kişand ku di encama operasyonê de rojnamegerên kurd hatin binçavkirin û bi demjimêran lêgerîna di buroyan de berdewam kir. Bi taybet rojnameya ‘Suedostschweiz’ a bi almanî weşanê dike, cihek berfireh da vê nûçeyê.
HOLANDA: Çapemeniya Holandayê jî nûçeyê spart ANF’ê û bal kişand ku ev zextên dawiyê mafê mirovan û azadiya çapemeniyê bi zoriyan re rû bi rû dihêlin.
Pêşî malpera nûçeyan a ‘nieuws.nl’ û piraniya çapemeniyê ragihandin ku rojnameger jî bûn qûrbana zagona ‘dijî-terorê.’ Şîroveya herî balkêş jî ji nûçegihanên malpera nûçeyan ‘nrc.nl’ ên li Tirkiyeyê hat. Nûçegihanê bi navê Niels Posthumus wiha got: “Di van demên dawiyê de kî li hemberî kurdan xwedî sempatî be, dibe hedefa polîsan.”
ÎTALYA: Portala nûçeyan a navdar a Îtalyayê LaPress.it bal kişand ser zêdebûna binpêkirina maf û azadiya ramanê ya di van demên dawiyê de li Tiriyeyê pêk tên û nivîsand ku beriya binçavkirina rojnamegeran parêzerê îtalî yê Ocalan jî hatibû girtin. Malpera bi navê ‘Linkiesta.it’ jî bal kişand ku Tirkiye bûye mîna girtîgehekê û pirsa “Gelo ev e modela Erdogan?” pirsî.
SWÊD: Çapemeniya Swêdê jî nûçeya pêla binçavkirina rojnamegeran ji AP’ê wergirt û sernûçeya ‘Li Tirkiyeyê rojnameger hatin binçavkirin’ bi kar anî. Malpera nûçeyan a Swêdê ‘helagotland.se’ jî bal kişand ku ji ber îdîayên ku dibêjin têkiliya rojnamegeran bi milîtanên kurd re hene, hatine binçavkirin.
RÛSYA: Yek ji saziyên herî navdar ên Rûsyayê ajansa nûçeyan a Ria Novosti bal kişand ser pêla binçavkirina rojnamegerên kurd û sernûçeya “Li Tirkiyeyê li hemberî cûdakaran operasyon” bi kar anî. Ajansa rûsan ragihand ku hikûmeta tirk bi PKK’ê re dest bi muzakereyan nake û dixwaze PKK’ê bi tundiyê biqedîne.ANF

Ev nûçe 228 car hate xwendin.
Yên pêsî || ên pistî >>

Nûçeyên Cîhan