NAVENDA NÛÇEYAN- AMED

Di nava van deh mehên derbasbûyî bi dehan daxuyaniyên şermezarkirinê yên ji alî rêxistinên navneteweyî ve li dijî hikûmeta Sûriyeyê hatin belavkirin. Bi dehan biryarên ambargoyê ji alî welatên Ewropa û Yekitiya Ereban ve li dijî Sûriyeyê hatin derxistin. Lê mixabin ev rewşa zext û zorê, girtin û îşkenceyê, binçavkirin û kuştinê rojekê jî navber nedaye gelê Sûriyeyê.
Rojane bi dehan kes tên kuştin û her ku diçe hejmara qurbaniyan zêde dibe, bi taybetî jî piştî damezrandina hêzeke çekdarî ya ku li dijî artêşa Sûriyeyê şer dike, hejmara kuştiyan zêdetir bû. Ji destpêka serhildana gelê Sûriyeyê hikûmetê behsa komên çekdar dikir û muxalefetê jî ev yek înkar dikir lê niha ew rastî jî derkete holê û niha bi navê leşkerên veqetyayî komeke çekdar hatiye avakirin ku navê artêşa azad a Sûriyê li xwe dike û bi artêşa Sûriyeyê re şer dike.

KUŞTÎ ZÊDE DIBIN
Çalakvanên mafê mirovan ên li Sûriyeyê diyar kirin ku di encama bûyerên roja çarşemê de li seranserê Sûriyeyê derdora 30 kesî hatin kuştin. Ji kuştiyan 8 leşkerên girêdayî artêşa hikûmetê jî hebûn, guman hene ku ji aliyê leşkerên veqetiyayî ve hatibin kuştin.
Rêxistina çavdêriya mafê mirovan ku navenda wê li Londonê ye dibêje: “Hêzên asayîşa Sûriyeyê gule otomobîlekê ku ber bi gundekî nêzî bajarokê Xebat ve diçû û di encamê de 5 kes hatine kuştin.”
Li gorî daxuyaniya Şamê li nêzî gundekî yê Hemayê kemîn li hemberî karwanê hêzên hikûmetê hatiye danîn û leşkerên hikûmetê yên di nav de hatine kuştin.
Di daxuyaniyê de tê gotin ku hêzên hikûmetê li navçeyên din ên Sûriyeyê herî kêm 20 sivîl kuştine. Li gorî heman daxuyaniyê sêşema borî li Îdlîbê herî kêm 24 kes ji aliyê hêzên ewlekariyê yên Sûriyê ve hatine kuştin.
Ofîsa Mafên Mirovan a Neteweyên Yekbûyî jî dibêje, gelek raporên cihê baweriyê ji çavkaniyên cûda-cûda gihane destê wan û ev raporane nîşan dide ku ji dema dest pê kirina nerazîbûnên li hemberî rejîma Sûriyeyê ve hêjmara kesên hatine kuştin gihaye 5 hezar kesî.
Lê balyozê Sûriyeyê yê Neteweyên Yekbûyî ew hêjmar red kir û wekî ‘nerast’ wesif kir.

LI DERVE ÎSLAMÎST LI HUNDIR ÇEPGIR
MUXALIFÊ ÇEPGGIR Ê SÛRIYEYÎ Wajdî Mustefa di gotareke ku ji aliyê rojnamevan Berzan Îso hatiye amadekirin û di Ajansa Firatê de hatiye weşandin de da xuyakirin ku têkiliya leşkerên ji artêşa Sûriyeyê veqetiyayî , bi hin dewletan re cihê metirsiyên mezin e. Mustefa da xuyakirin ku ev muxalefet li derveyî Sûriyeyê xwe wekî îslamîst û li hundirê Sûriyeyê xwe wekî çepgir didin nîşandan.
Mustefayê ku 14 salên xwe di navbera 1980 û 2008’an de di zindanê de derbas kiriye û ev 2 meh in li Amerîkayê dijî tevli piraniya konferansên muxalefetê bûye. Wajdî Mustefa ku bi eslê xwe elewî ye herî dawî tevli konferansa li Antalyayê bûye û li wir wekî endamê rêveberiya kongreyê hatiye hilbijartin û wekî alîkarê serokê Meclisa Sûriyeyê ya Stenbolê hatiye pêşniyarkirin lê wî ew peywîr nepejirandine. Mustefa da xuyakirin ku Meclisa Neteweyî tenê temsîla beşekî ji gelê Sûriyeyê yê serhildêr dike û piraniya gelê Sûriyeyê xwe ji ber bandora îslamiyan didin alî û naxwazin deshilatdarî bikeve destê wan.

KURD Û ELEWÎ
Her wiha di berdewamiya hevpeyvîna xwe de Mustefa behsa kurdan jî kir û wiha got: “Kurd parçeyekî bingehîn ji gelê Sûriyeyê ne û pêwîst e ku daxwazên wan ên azadî û demokrasiyê bi cih werin anîn. Her wiha got ku kurd û elewî ne alîgirên destwerdanên hêzên derve ne û ew naxwazin ku desthilatdariya vî welatî bikeve destê van hêzên qaşo îslamî.”

Ev nûçe 272 car hate xwendin.
Yên pêsî || ên pistî >>

Nûçeyên Cîhan