Pêşnûmeya Qanûna Qirkirina Ermeniyan a ku di navbera Franse û Tirkiyeyê de dibe sedema rageşiyê, nêzî 13 salan e di rojevê de ye, lê heta niha nekariye di Meclisa Fransayê re derbas bibe. Ev pêşnûme beriya hilbijartinên serokomariyê yên 2012’an dîsa hate rojevê û tê payîn ku di 22’yê kanûnê de bikeve dengdanê.

QIRKIRINÊ QEBÛL KIRIBÛ
Fransayê di 29’ê çileya 2001’an de qirkirina ermeniyan a di 1915-16’an, bi awayekî fermî qebûl kir. Her çendî ne welatê yekem ê ku vê qirkirinê qebûl kiriye jî, lê serokomarê sosyalîstê ê berê François Mitterand di 1984’an de qirkirinê bi fermî nas kir. Lê ev ev naskirin tenê weke jesteke şexsî hate qebûlkirin.
Ev pêşnûmeya ku têde înkarkirina qirkirinê weke suc tê dîtin, cara yekemîn di 1998’an de ji aliyê sosyalîstan ve hate meclisê. Diviya ku Senato qebûl bike, lê piştî ku Tirkiyeyê got ku ew ê hilberînera helîkopteran Eurocopterê boykot bike, pêşnûme qet nehat rojeva senatoyê.
PÊŞNÛMEYA LI MECLISÊ
Di sala 2006’an de, dîsa senatoreke sosyalîst bi pêşnûmeya qirkirinê ve hate meclisê. Vê carê hate qebûlkirin. Lê her çendî bi salan e hatiye qebûlkirin, dîsa neçû ber destê Senatoyê. Ji ber wê jî nehat pêkanîn. Di 5’ê tîrmeha 2010’an de dîrokê xwe dubare kir. Di 2006’an de Parlamenterê Partiya Sosyalîst Serge Lagauche pêşnûmeya ku hatibû qebûlkirin, weke heyî dîsa anî rojeva meclisê. Lê raportorên partiya desthilatiyê UMP’ê diyar kirin ku dibe ev yek bibe sedema rîskên siyasî.
Komîsyona Meclisê vê nêrînê esas girt û qebûl nekir. Îsal parlamenter Valérie Boyer pêşnûmeyek pêşkêşî meclisê kir. Ev pêşnûme di 7’ê kanûnê de ji aliyê Komîsyona Meclisê vehate qebûlkirin. Di 22’yê kanûnê de jî dê ji aliyê meclisê ve were lêkolînkirin. Senator Philippe Kaltenbach jî berî mehekê pêşnûmeyek wiha dabû.

ERDOGAN GEF XWARIN
TIRKIYEYA ku bi dîroka xwe re raber nabe û qirkirina milyonek û nîv ermenî red dike, li Fransayê gef xwar. Serokwezîrê Tirk Recep Tayyîp Erdogan ji Serokomarê Fransayê Nicolas Sarkozy re nameyek şand û wiha got: “Em xebatên qanûnkirina wê pêşnûmeya qanûnê ji nêzî ve dişopînin. Ev pêşnûme yekser Dewleta Komara Tirkiyeyê, neteweya tirk û tirkên li Fransayê dijîn dike hedef. Ez dixwazim bi aşkereyî bibêjim ku ger ev pêşnûme encam bigire, dê encamên xirab ên di têkiliyên Tirkiye-Fransa yên siyasî, aborî, çandî û hemû waran de bi xwe re bîne û sedemê van hewldanan xwediyên wan bi xwe ne.” Berdevkê Serokwezîr û Berdevkê Hikûmetê Bulent Arinç jî diyar kir ku ew ê hewldanên di vî warî de bikin û got; “Em têkiliyên xwe yên ligel hikûmet û parlamentoyan de ji bo astengkirina vê pêşnûmeyê bi kar bînin.”PARÎS - ANF

Ev nûçe 342 car hate xwendin.
Yên pêsî || ên pistî >>

Nûçeyên Cîhan