Li navçeya Artemêta Wanê ji ber barana ku beriya 5 rojan bariya gelek mal, kargeh û baxçe di bin avê de man û navçe terkî qedera xwe hate kirin. Li cihên ku zirar dîtine tespîta zirarê nehat kirin û riya ku ji aliyê Şaredariya Artemêtê ve hate çêkirin jî hate rewşeke ku nayê bikaranîn.
Di 25'ê îlonê de baranek zêde li navçeya Artemêtê bariya û lehî rabû. Ji ber lehiyê, gelek kargerî û baxçe dibin avê de man û welatiyên navçeya Artemîta Wanê zirarek mezin dîtin. Ji ber barana zêde qanala Şamranê di ser de çû û ava baranê bû lehî û her der da ber xwe. Di serî de li taxa Yenîmahalle gelek tax û nokteyên din di bin avê de man. Bi hezaran dolim zevî û baxçeyên welatiyan di bin avê de man. Rê û piran ji ber lehiyê zirarek mezin dîtin. Çemê Kotur û Cabirê di ser de çûn û her der bû gola avê. Ji ber ku hêza lehiyê zêde bû, rêyên şaredariyê nû çê kiribûn û kolanên ku ji aliyê şaredariyê ve bi kevirên parkeyan nû hatibûn pêçan dîsa xera bû. Berhemên salê yên welatiyan hemû di bin avê de çû û ziyanek mezin pêk hat.
5 ROJ DERBAS BÛN
Li gel ku 5 roj di ser lehiyê re derbas bûn û bi dehan mal di bin avê de man jî heta niha rayedarên dewletê ji bo tespîta zirarê bikin tu lêkolîn nekirine. Welatiyan diyar kir ku ji ber qanala Şamramê ya aydî DSÎ ye nehatiye paqijkirin xetimiye û av bûye lehî û bi ser wan de hatiye. Welatiyan, bertekên xwe anîn ziman û destnîşan kir ku hemû bax û bistanên wan tev hêj di bin lehiyê dene û zirarek mezin dîtine. Welatiyan, destnîşan kir ku her çend Şaredariya Artemetê xebatan bimeşîne jî ji ber ku hêz û mercê wê tune nikare bi lezgîn alîkariyê bike.

CUDAKARÎ TÊ KIRIN
Welatiyan bertek nîşanî Qeymeqamê navçeyê û Waliyê Wanê da û destnîşan kir ku 5 roj di ser bûyerê re derbas bûn, lê heta niha nehatine pirsa wan jî nekirine. Welatiyan, destnîşan kir ku di navbera bajar û navçeyên herêma rojhilat û rojava de cudakarî tê kirin û rayedarên dewletê bi qasî li hemberî bajarên rojava hasas in, li bajar û navçeyên rojhilat ne hasas in.
Rayedarên şaredaiyê jî anî ziman ku wan jî ji vê lehiyê zirarek mezin dîtiye û li gorî şert û derfetên xwe hewl didin ku alîkariyê bidin welatiyan. WAN - DÎHA

Ev nûçe 1137 car hate xwendin.
Yên pêsî || ên pistî >>

Nûçeyên Civak û Jiyan