NAVENDA NÛÇEYAN - AMED

Sedema bingehîn ê ku nahêle ev serhildana gelê Sûriyeyê nabe şoreşeke mezin ew ku hikûmeta Sûriyeyê ji damezrandina xwe û heta niha, ji Esadê bav û heta Esadê law rê nedane azadiyan û herdem muxalifên ku hene an tune kirine an jî ew parçe kirine. Dema mirov bala xwe bide rewşa siyasî ya li Sûriyeyê bi giştî mirov vê yekê baş dibîne. Rejîma Sûriyeyê li hemberî xwe tucaran nehiştiye ku muxalefetek bihêz çêbibe, herdem bi riyên cuda ew parçe kirine û li dijî hev dane bikaranîn.

REWŞA PARTIYÊN KURDAN
Dema mirov bala xwe bide rewşa partiyên kurdan ên li Rojava û Sûriyeyê jî dîsa ew tablo baş xuya dike. Li Sûriyeyê her ku partiyeke kurdan hinekî gel li dora xwe dida hev û hinekî bi serhev ve kom dibû, rejîmê bi riya dezgeh û saziyên xwe yên istixbaratê bi fen û xapan dubendî û nakokî di nava wê partiyê de çêdikir û piştî demekê ew partî dibû 2 partî û wiha heta ku ji 2-3 partiyan bû 13-14 partî.
Lê di van bûyerên dawî de û bi destpêkirina serhildana gelê Sûriyeyê hewldaneke hêja bi tevlibûna 11 partiyan çêbû û gotina xwe li hemberî rejîma Sûriyeyê kirin yek. Di wê demê de, dema ku wekî hêz hatin xuyakirin rejîma Sûriyeyê mecbûr mabû ku bang li wan bike û wan di wê demê de banga wî qebûl nekir û gotin heta kuştin hebe em nayên diyalogê. Lewra jî dema ku hêza kurdan bibe yek ne tenê rejîma Sûriyeyê dê ji alî her kesî û hemû hêzan ve were qebûlkirin û wê xwedî wezin û gotineke cuda be.
Hejmara kesên ku roja çarşemê di destê hêzên ewlekariya Sûriyeyê hatin kuştin giha 16 kesan û di dehan binçavkirin di serdagirtinên malan de lig elek bajaran çêbû. Di heman demê li deverên cuda xwepêşandanên nerazîbûnê yên gelê Sûriyeyê jî her berdewam dikin. Navenda xwepêşandanan dîsa bajarên Hema, Humus, Idlib û navçeyên Şamê bû. Di xwepêşandanên vê rojê de nerazîbûna li hemberî vetoya Rûsya û Çînê jî ji alî xwepêşandêran ve bi rengek,î berz hate ziman.

NERAZÎBÛNA JI VETOYÊ
Piştî ku pêşnûmeya danekirinên tund ên li hemberî rêveberiya Şamê ji aliyê hin endamên NY’yê ve hatibûn amadekirin, ji aliyê Rûsya û Çînê ve hatin redkirin. Ev yek bi tundî ji alî Amerîkayê ve hate rexnekirin.
Pêşnûmeya, ku ji Konseya Ewlehiyê ya Neteweyên Yekbûyî (NY) hate pêşkêşkirin ev demeke, ji bo ku hin guhertinên rê li ber vetoyan digire bên peydakin dihate taloqkirin. Ji ber vê jî pêşnûmeya bi pêşengiyara dewletên ewropî yên endamê konseyê ve hatibû amadekirin hinek hatiye nermkirin û li hemberî rêvebiriya Şamê cihê Danekirinan pêşniyara Girtina tedbîrên pêwîst hatiye kirin.
Amerîkayê li ser zimanê wezîra Karê Derve Hilary Clinton ev helwesta Çîn û Rûsyayê wekî piştgiriya bi tundiyê re nirxand û got ku dê gelê Sûriyeyê hesabê vê yekê ji wan bixwaze.

Ev nûçe 1046 car hate xwendin.
Yên pêsî || ên pistî >>

Nûçeyên Cîhan