Serokê Konseya Rêveber a KCK'ê Murat Karayilan diyarkir ku hikûmet dixwaze wisa bike, sê û çar kes nikarin bi hev re dabikevin kolanan û wiha got: “Wê demê hûn jî li hemberî vê yekê di her firsendekê de dabikevin kolanan. Mîtîngên bi bandortir li dar bixin. Xwepêşadanên protestoyî yên civakî yên bi bandortir bikin.” Karayilan bang li kurdan kir ku li tu saziyên dewletê bi tirkî neaxivin û got; “Em êdî vê yekê weke helwesteke neteweyî pêş bixin.”
Murat Karayilan der barê kampanyaya BDP’ê ya ‘Ez xwe îxbar dikim’ de wiha got; “Pêşî ez vê bibêjim, çalakiya “Ez KCK’î me, xwe îxbar dikim” bi ya min ev çalakiyên wiha ji pêvajoyê re nabin bersiv. Lê madem çalakiyeke wiha hatiye destpêkirin, divê bi awayekî xurtir hibêjz bikin. Li her bajareke sed an jî sed û pêncî kes diçin xwe îxbar dikin.”
Karayilan têkildarê mitîngên li Stenbol, Amed, Êlih, Şirnex û li gelemperiya bajarên Kurdistanê bi boneya şermezarkirina operasyonan û tecrîda li ser Ocalan têne lidarxistin li hemberî pêvajoyê mudaxeleyeke baş in û gel bi van mitîgan bersivek baş dide operasyon û polîtîkayên AKP’ê yên li hemberî kurdan û wiha got “Ez li vir bang li hemû welatparêz, bi rûmet, ciwanên kurd, jinên kurd ên xwedî rûmet û şeref, hemû derdorên welatparêz, esnaf, gundî, feqîr, dewlemend û her kesê dikim: Madem evane dixwazin gelê me bê bandor bihêlin, dixwazin ku tenê 3 an jî çar kes derbikevin kolanan; Wê demê hûn jî li hemberî vê yekê di her firsendekê de dabikevin kolanan. Mîtîngên bi bandortir li dar bixin.”Karayilan bal kişand polîtîkayên AKP’ê û Cemeeta Gulen a li hemberî melayan jî û diyar kir ku kevneşopiya medreseyan û kesên ku di medreseyan de perwerde dîtine, her tim din ava civaka kurd de xwedî ciheke girîng in û di aliyê pêşxistina hişmendî û çandî de cihek girîng girtine û mela her tim hatine qewitandin.
Karayilan di hevpeyvîna xwe de bal kişand ser çalakiya ciwanê kurd Firat Îzgîn jî û wiha got: “Em dixwazin zor bidin vê dewletê, da ku vê heqîqetê qebûl bike. Firat Îzgîn ciwanekî kurd ê 15 salî bû. Xweşewitandina wî dilê me jî şewitand. Ez carekî din ji mala wî ya rêzdar û hêja re sersaxiyê dixwazim.” Karayilan got divê tu ciwanek serî vê rêbazê nede û çalakiyên bi vî rengî napejirînin.

DEWLETEKE ELETEWŞ
Karayilan bal kişand ser leşkerên dewleta tirk ên ji aliyê gerîlayan ve dîl tên girtin û di vî warî de helwesta dewletê û wiha got: “Ev dewleta dewleteke wiha ye erkdar û kadroyên xwe dide şerkirin û dişîne pevçûnan, lê dema dîl dikevin jî xwedî li wan dernakeve.
Jixwe ji bo wan pariyekê jî nakeve nava hewlan, yên ku di vî warî de dikevin nava hewldanan jî dadgeh dike. Ev dewletek eletewş e ku xwedan erkdarên xwe jî dernakeve. Pir girîng e ku ev feraset û zîhniyeta ku tu mirovbûnek pêre nemaye, bê teşhîrkirin û ravekirin.”

ARAS BIBÎR ANÎ
Karayilan balkişand ser girtiyê nexweş Mehmet Aras ku jiyana xwe ji dest da wiha got: “Du meh berê lîsteya hevalên me yên di zîndanên dewleta tirk de tên girtin, gihîşt ber destê min. Di nav vana de 102 hevalên me yên giran û xedar nexweş in hene. Herî dawî hevalê me Mehmet Aras di Girtîgeha rejîmê ya Erziromê de şehîd ket. Ez li vir ji bo rêhevalê hêja Mehmet Aras ê ku bo rûmet û anora xwe tu tawîzek neda, teslîm nebû û her bi reqneqdarî li ser xeta berxwedêriyê bû, di serî de malbat û hezkiriyên wî, ji hemû gelê Kurdistanê re sersaxiyê dixwazim. Em ê bîranînên wî, di têkoşînê de her geş bikin. Binêrin mêtingerî û bêwijdaniya dewleta tirk serboriya jiyana hevalê me Mehmet Aras pir bi zelalî radixe ber çavan.” Karayilan bang kir ku bila girtiyên nexweş serbest bên berdan û wiha got: “Em bangî dewletê dikin ku li hemberî van kesên ku hatine ber mirinê, wijdan û niyeta pak bi pêş bixe.”

‘Divê em bi tirkî neaxivin’
MURAT KARAYILAN destnîşan kir ku divê kurd bi tu saziyek rejîma Enqereyê re tirkî neaxivin, û wiha got: “Divê civaka kurd piştgiriya helwesta neteweyî ya siyasetmedarên kurd dane destpêkirin bike. Riya vê yekê jî ew e ku divê êdî tu kes bi dewletê tirkî neaxive. Ger ev dewleta dixwaze li Kurdistanê bi vî gelî re bijî, ya wê tehamul bike zimanê vî gelî guhdarî bike, ya dê fêr bibe, yan jî dê wergêr bibîne. Divê em vê yekî êdî weke helwesteke neteweyî bi pêş bixin. Em bi tu saziyek dewletê bi tirkî neaxivin, em bi kurdî biaxivin.”
Karayilan balkişand ser parastina kurdî û wiha got: “Lê belê min bihîst ku hinek girtiyan hem bi kurdî hem jî bi tirkî parastina xwe daye. Niha ev nermbûnek e û ne rast e. Ger te bi kurdî parastina xwe amade kiribe, çima tu bi tirkî jî dike? Pêşniyara me ew e ku divê ev yek bi awayekî bê sererastkirin.”
BEHDÎNAN - ANF

Ev nûçe 368 car hate xwendin.
Yên pêsî || ên pistî >>

Nûçeyên Polîtîka