Di dawiya hefteyê de rêxistinên kurdan ên li Swêdê li hev civiyan û pêşketin û geşedanên li Rojhilata Navîn û Kurdistanê gotûbêj kirin. Di civînê de bal hate kişandin ku divê kurd li hemberî polîtîkayên înkar û îmhayê tekoşîna xwe xurtir bikin û ev yek jî bi xurtkirina yekitiya neteweyî dibe.
Li ser bangawaziya Kongreya Neteweyî ya Kurdistanê (KNK) piraniya wan nûnerên rêxistinên kurdan beşdarî civîna li Navenda Perwerdeya Karkeran a Stockhlomla paytexta Swêdê bûn. Civîn ji aliyê Şoreş Reşî û Behzad Pirmûza ve hate birêvebirin. Endamê Konseya Rêveber a KNK’ê Dr. Bengî Haco axaftinek kir.
Haco der barê rewşa têkoşîna azadiya Kurdan a li her çar parçeyên Kurdistanê de û pirsgirêkê wan de agahî da. Haco destnîşan kir ku herî zêde kurd niha bi êrîşan re rû bi rû ne û bal kişand ser yekitiya neteweyî. Li ser navê Partiya Demokrat a Kurdistanê (PDK) Hesen Hatemî axivî û diyar kir ku ji bo pêkhatina yekitiya neteweyî tu şertên wan tune ne û rexne kir ku hin rêxistinên rojhilatê Kurdistanê li derveyê nîqaşên Yekitiya Neteweyî dibînin. Hatemî wiha got: “Di rastiyê de me Kurdistanê di serê xwe de jî parçe kiriye. Divê em ji bo yekitiya neteweyî tu şertan daneynin pêşiya xwe. Em ê van hemû di civîna xwe ya ku wê di 22-23’ê cotmehê de bê lidarxistin de gotûbêj bikin.”
Elî Îsmaîl Ferec jî li ser navê Tevgera Goranê axivî û bi bîr xist ku dewletên dagirker ên paşverû gelê kurd di warê erdnîgarî, mezheb, bîrdozî û saziyan de parçe kiriye. Ferec bal kişand ku ji bo pêkhatina Yekitiya Neteweyî roleke mezin dikeve ser milê KNK’ê.
Rizgar Îsmaîl jî bi navê Yekitiya Niştîmanî Kurdistan (YNK) axivî û diyar kir ku ew ji bo pêkhatina yekitiya neteweyî hêvîdar e û ji her kesê re serkeftin xwest.
Mahîr li ser navê Koma Civakên Kurdistanê (KCK) axivî û got: “Em yekitiya neteweyî ya kurdan wekî dewlemendiyeke pîroz dibînin. Ji bo pêkhatina yekitiya neteweyî, tişta ji me bê em ê bikin û di vê çarçoveyê de em ji bo hemû hevdîtinan amade ne. Divê em hemû rêxistinên kurdistanî bi boneya li dijî dagirkeriya li ser Kurdistanê bicivin û yekitiya neteweyî pêk bînin. Divê tu rêxistin ji vê yekê nereve û ji bo yekitiya neteweyî tişta ku dikeve ser milê wan bi cih bînin. Divê em berjewendiyên gelê xwe li ser yên partiyên xwe re bibînin. Divê bi tu awayî ji bo şerekî navxweyî destûr neyê dayîn. Kerkûk jî di nav de, divê em hemû bi hev re li hemberî êrîşên li ser Kurdistanê rabin û biparêzin.”
Her wiha Rêbiwar Hesen, Naîle Aras, Kurdo Baksî, Dr. Osman Aytar, Nazîf Mayî, Dr. Husseyin Xeligî û Ahmet Karamuş jî beşdarî civînê bûn. ANF

Ev nûçe 1176 car hate xwendin.
Yên pêsî || ên pistî >>

Nûçeyên Cîhan