NAVENDA NÛÇEYAN - AMED

Ev serê 10 mehan e her roj nûçeyên mirinê ji Sûriyeyê tên û di dema dawî de hejmara kuştinan zêde dibe û her 24 saetan zêdeyî 24 kesan tên kuştin. Di encama operasyonên roja şemiyê ên li bajarên Sûriyê de 29 kes hatin kuştin. Bi dehan kes jî hatin girtin.
Komîteyên Herêmî yên Sûriyê diyar kirin ku di operasyonên li çend bajarên Sûriyê de 29 kes hatine kuştin. Li gorî vê yekê li Îdlîb 12, li Hûmisê zarokek, 2 kes jî di encama îşkenceyê de û bi giştî 9 kes, li Şamê 6, li Deraa û Hemayê jî 2 kes di encama operasyonên ji aliyê rejîmê ve hatine kuştin.
Komîteyê her wiha diyar kir ku gelek kes birîndar bûne û ji aliyê rejîmê ve hatine girtin.

ROLA TIRKYEYÊ
Cîgira Serokomarê Sûriyeyê Necah El Ettar diyar kir ku pêwendiyên navbera gelê Sûriyeyê û Tirkiyeyê ne bi qeyranên siyasî ve girêdayî ne û got: “Erdogan niha serkêşiya kampanyaya dijberiya Sûriyeyê dike.”
El Attar, Serokê Giştî yê Partiya Saadetê yê Tirkiyeyê Mustafa Kamalak û şanda pê re di meqama xwe de qebûl kir û got: “Siyaseta Serokwezîrê Tirkiyeyê Recep Tayyip Erdogan a derbarê Sûriyeyê de zererê dide gelên her du welatan, xizmeta welatên Rojavayî dike û bo herêmê aloziyê tîne.”
Li gorî malpera Prensa Latina News, Cîgira Serokomarê Sûriyeyê El Atar got: “Di destpêkê de Erdogan, Serokomarê me Hafiz Esed wek hevalbendekî girîng didît û bi Sûriyeyê re peymana hevkariya stratejîk îmze kir. Lê piştre, ji nişka ve hemberî me fikra xwe guhert. Niha serkêşiya kampanyaya dijberiya Sûriyeyê dike.”
Tiştê herî balkêş ew e ku Tirkiyeyê piştî gelek fort û zirtên germ niha jî wekî hikûmet bêdeng maye û ji bo sererastkirina pêwendiyên bi Sûriyeyê re hin aliyên din ketine dewrê. Dibe ku mirov serdana partiya Saadetê jî di vî warî binirxîne lê nayê zanîn ku çiqasî haya wan û hikûmeta AKPê ji hev heye an na.

VEKIŞANDINA ÇAVDÊRAN
Komkara Ereban ragihand ku tu niyeta wan a vekişandina şandeyên xwe yên çavdêran ji Sûriyeyê tune ye.
Li gorî nûçeya AFP’ê, Alîkarê Sekreterê Giştî yê Komkara Ereban Ednan Îsa ragihand ku di rojeva Komîteya Wezîrên Ereban de vekişandina çavdêran ji Sûriyeyê tune ye.
Îsa diyar kir ku li Sûriyeyê heta niha 153 çavdêr li Sûriyeyê ne û tê payîn ku îro jî 10 çavdêrên din ji Urdinê bên û got; “Em behsa vekişîna vê mîsyon nakin, em behsa bihêzkirina wan dikin.
REWŞA KURDAN
Tevî hemû cudahî û nakokiyên di navbera partiyên kurd de dîsa gelê kurd ji hemû gelên din ên ku li Sûriyeyê dijîn bêtir bir êk û pêk û bi rengekî rêxistinkirî tevdigerin.
Kurd di hemû meş û xwepêşandanên xwe de daxwazên xwe bi rengekî aştiyane tînin ziman û naxwazin ku tundî derbasî bajarê wan jî bibe. Gelek hewldan çêbûn ku bajarên kurdan jî her sibe li ser nûçeyên kuştinên nû şiyar bibin û her roj darbestên zarokên xwe li ser milê xwe bikin lê tevgera gelê kurd li dijî wan daxwazan bi aqil tevgeriya û hemû rengên tundiyê red kir. Tevî hemû nakokiyên kurdan dîsa jî di daxwazên giştî gelekî nêzî hev difikirin.

Ev nûçe 816 car hate xwendin.
Yên pêsî || ên pistî >>

Nûçeyên Cîhan