Komîteya Çapemeniya PAJK’ê bi boneya şermezarkirina binçavkirina rojanegerên kurd û sosyalîst daxuyaniyek weşand û got; “Her ciwana/ê kurd divê weke nûçegihan, rojnamevan, belavkar û kedkarekî çapemeniya azad bixebite.”
Komîteya Çapemeniyê ya Partiya Azadiya Jinan a Kurdistanê (PAJK) got; “ Ev xeta çapemeniya azad xwe dispêre giyan û ramana azad a Apê Musa, Gurbetelî Ersoz û bi sedan şehîdên çapemeniyê yên ku singa xwe di riya heqîqetan de kirine mertal. Çapemeniya kurd bi rojnameya Kurdistan li derveyî welat, li penaberiyê dest bi weşanê kir. Heta niha ji bo vegera welat a çapemeniya kurd jî berdêlên mezin hatine dayîn” û bang li hemû ciwanên kurd kir ku bibin nûçegihan.

TIRSA VÎNA AZAD
Di daxuyaniyê de wiha hate gotin; “Êrîşa li ser gelê kurd tê meşandin tirsa ji vîna azad e. Dewleta tirk a ku bi dehan sal e li hember gelê kurd polîtîkaya înkar û îmhayê pêk dianî, di encama tekoşîna azadiya gelê kurd a çil salên dawiyê de têk çû. Ev 80 sal in li ser gelê kurd her awayê polîtîkaya înkar û îmhayê hat pêkanîn. Kurd rastî hemû êrişên faşîst ên dewleta tirk hatin.”
PAJK’ê diyar kir Tevgera me PKK’ê li ser vê kevneşopiya berxwedanê weke hêvî û yekane riya azadiyê, ji sala 1970’î yan ve li Kurdistanê li hember van polîtîka û kiryarên dewleta tirk ên înkar û îmhayê tîkoşînekî destanî ya berxwedanê meşand. Polîtîkayên înkar û îmhayê yên dewleta tirk di encama tekoşîna çil salên dawiyê yên di pêşengiya Rêberê Gelê Kurd Abdulah Ocalan û tevgera me PKK’ê de têk çûn. Di encama vê dîroka berxwedanê ya tijî qehremanî û fedakarî de gelê kurd xwe nas kir, zanebûn û vîna xwe gihandina nasnameya xwe ya azad qezenc kir.”

XULAM Û TAŞERON
Di daxuyaniyê de hate gotin ku hikûmeta AKP ya ku di Rojhilata Navîn de xulamî û taşeroniya hêzên emperyalîst û NATO yê dike, bi hêrsa têkçûn û binketinê, êriş li ser êrişan pêk tîne li hember gelê kurd û wiha berdewam dike; “ Bi van êrişên faşîzan, terorîst û hovane dixwaze vîna gelê kurd dîl bigre, bi tepisîne û tine bike. Lê weke dîroka gelê kurd, dîroka çapemeniya azad jî xwedî qehremanî û berxwedaniyên mezin e. Ev xeta çapemeniya azad xwe dispêre giyan û ramana azad a Apê Musa, Gurbetelî Ersoz û bi sedan şehîdên çapemeniyê yên ku singa xwe di riya heqîqetan de kirine mertal. Çapemeniya kurd bi rojnameya Kurdistan li derveyî welat, li penaberiyê dest bi weşanê kir. Heta niha ji bo vegera welat a çapemeniya kurd jî berdêlên mezin hatine dayîn.”

AKP BI AGIR DILÎZE
Komîteya Çapemeniyê ya PAJK’ê; wiha berdewamî da daxuyaniya xwe; “Lê dewleta tirk û hikûmeta AKP bi agir dilîze” û got; “Weke rojnamevanê kurd, Abdurahman Gok jî, gotî; ‘divê ji vir û şûn ve her rojnamevan û kedkarê çapemeniya azad bê rawestan di şûna hevalên xwe yên hatine binçavkirin de jî bixebitin. Gelê kurd, bi taybet ciwanên kurd divê li nirx û rûmetên xwe xwedî derkevin. Li cihê ku heta niha du kes lê dixebitî divê hijmar bigihêje deh kesî. Her ciwana/ê kurd divê weke nûçegihan, rojnamevan, belavkar û kedkarek çapemeniya azad bixebite. Ji bo vala derxistina polîtîkayên şikandin û radestgirtinê yên hikûmeta AKP, divê ji heft salî heta heftê salî her endamek civaka kurd bi giyana seferberiya neteweyî beşdarî pêvajoya niha bibe. Her kurdek li gor hêz û şiyana xwe beşdarî têkoşînê bibe.”

DENGÊ XWE BILIND BIKIN
Êrîşên li ser gelê kurd tên meşandin di heman demê de li hember demokrasî û pêşeroja azad a gelên Tirkiyê ye. Lewma divê hemû demokrat, rewşenbîr, rojnamevanên xwedî rûmet û aligirên heqîqetan, hemû dijberên faşîzm û terora AKP, gelê Tirkiyê yê bi rastî dildarê aştî û biratiyê, saziyên civaka sivîl û her mirovê xwedî wijdan, ji vê teror û faşizma AKP’ê re bêje bese û dengê xwe li hember van êrişan bilind bike. Ji ber ev êrîş bi armanca reşkirina pêşeroja gelan tên pêkanîn. Ger pêşî lê neyê girtin, ne tenê gelê kurd, wê her kes ji vê faşizmê para xwe bigre û pêşeroja Tirkiyê wê di nava tariyan de bifetise.”

NIKARE VÎNA AZAD BIŞKÎNE
Komîteya Çapemeniya Partiya Jinan got; “Divê bê zanîn êrîş û terora hikûmeta AKP ê wê têkoşîna me lewaz neke, vîna me ya azad nekare bişkîne û wê nekare pêşiyê li vegotina heqîqetan bigire. Em weke xebatkarên çapemeniya Partiya Jinên Azad ên Kurdistanê, êrîş û terora hikûmeta AKP’ê bi tûndî şermezar dikin. Em bang li hemû gelê xwe, bi taybet jin û ciwanên kurd dikin ku, ji her demê zêdetir tîkoşînê bilind bikin. Rojên em dijîn, rojên dîrokî ne. Zêdebûna di dozan êrîşên li ser gelê kurd tên meşandin, bingeha xwe ji tirs û xufa serkeftina têkoşîna me digre. Bi rihê berxwedana neteweyî em dikarin pêşiyê li her cure êrîşan bigrin û têkoşîna xwe bi azadiyê tacîdar bikin. Bi baweriya min dê ti êrîş nekaribin pêşeroja me ya azad tarî bikin, di serî de Rêberê Gelê Kurd Abdulah Ocalan, em hemû berxwedanvanên li girtîgehan silav dikin, soza bilindkirina têkoşînê didin gelê xwe.” BEDHÎNAN-ANF

Ev nûçe 727 car hate xwendin.
Yên pêsî || ên pistî >>

Nûçeyên Jin