Li ser navê girtiyên PKK û PAJK’î Denîz Kaya daxuyaniyek nivîskî da û diyar kir ku greva birçîbûnê ya girtiyên PKK û PAJK’î ya ji bo balê bikişînin ser tecrîda Rêberê Gelê Kurd Abdullah Ocalan dê bidome. Kaya di daxuyaniyê de diyar kir ku weke ku tê zanîn di 1’ê kanûnê de daxuyanî dabûn û diyar kiribûn ku ji bo protestokirina tecrîda li ser Rêberê Gelê Kurd Abdullah Ocalan û terora girtinê ya ser gelê kurd wek girtiyên PKK û PAJK’î dest bi greva birçîbûnê kiribûn. Kaya da zanîn ku piştî vê biryarê rejima şer a taybet zext, zordarî û polîtîkayên qirêj ên li ser hevalên di girtîgehan de zêdetir bûye û wiha got: “Di girtîgehên ku hevalên me lê dimînin roj tune ye ku agahiya îşkenceyê nayê. Her roj sewqkirinên bi zorê û êrîş pêk tên.”
Kaya di daxuyaniyê de tiştên ku tên jiyîn wiha vegot: “Serokwezîrê Tirkiye û hikûmeta AKP’ê şerm nakin û dibêjin li girtîgehan zimanê kurdî serbest e û girtî dikarin bi kurdî biaxivin. Em ji vir îlan dikin ev dereweke mezin e, xapandin e. Li girtîgehan wek duh, îro jî zimanê zikmakî qedexe ye, tê astengkirin. Tu weşanên kurdî nadin me yan jî bi zorê j ime pereyê tercûmanan tê xwestin. Dema ku em pere nedin jî ew weşan wek tiştek taluke tê nirxandin û nayê dayîn. Tu rojname, kovar û pirtûkê muxalîf-demokrat nayê dayîn. Tiştên ku malbatan dişînin jî yan winda dibin an jî di rewşekê ku neyê bikaranîn digihîje destên me.

‘GIRTIYAN DERMAN NAKIN’
Kaya da zanîn ku mafê qada hevpar ku di fermiyetê de hefteyê 10 saet e li tu girtîgehê de nayê pêkanîn, di nava tecridê, tecrîd tê jiyîn û wiha got: “Girtiyên nexweş û yên di sinorê mirinê de ne jî bi hişmendiyê nayên dermankirin û terkî mirinê tên kirin. Sewqên nexweşxaneyan nayên kirin, dermanên ku tên dayîn an nadin nexweşan an jî bi pere didin. Rayedarên girtîgehan pereyên ku malbatên girtiyan ku ji girtiyan re dişînin di bin navê ‘sermayeya digere’ nadin girtiyan.
Hevalên me yên girtiyên nû bi zorê dixin nava îtirafciyan û dixwazin bibin sixûr.” Kaya da zanîn ku tecrida li ser girtiyan ne bes e li malbatan jî îşkence dikin, malbatên ku tên hevdîtinan ji lêgerîneke dijmirovahî derbas dibin, divê yan bi awayekî tazî bên lêgerin an jî hevdîtin tê astengkirin.
Kaya diyar kir ku hikûmet û wezaretê hişyar dikin û wiha got: “Dawî li polîtîkayên zext, îşkence û antî-demokratik bînin. An jî em ê sekna xwe hişktir bikin. Heke sekna me hişk bibe ji tiştên ku bên jiyîn ne em, hikûmeta AKP’ê û wezaret berpirsyar e.”
Kaya destnîşan kir ku di girtîgehan de pêkanînên ku 12’ê Îlonê jî derbas dibin hene û wiha pê de çû: “Bi taybetî li girtîgeha Osmaniyeyê ewlehiya jiyana hevalên me tune ye. Hevalên me yên li girtîgeha Osmaniyeyê ne her roj bi zextek girantir rû bir û dimînin, dibe ku her dem ji wir agahiyek mirinê bê. Em bang li parêzvanên mafên mirovan û partiyên ku li meclisê komên wan hene dikin ku di serî de li girtîgeha Osmaniyeyê li hemû girtîgehan lêkolînan bikin. Heke ev wehşet û qirkirin bi dawî nebe em ê greva xwe ya birçîbûnê bidomînin. Biryara me teqez e, tu hêz nikare me ji biryara me vegerîne. Banga me ev e ku di serî de malbatên me, raya giştî û derdorên demokratîk bila bi hestyar bin û hêz bidin tevgera serhildanê.” AMED

Ev nûçe 244 car hate xwendin.
Yên pêsî || ên pistî >>

Nûçeyên Nûçe