Hevserokê BDP’ê Selahatîn Demîrtaş, di civînê de bal kişand ser tecrîda li Îmraliyê, pêvçûna li çiyayê Cudiyê û operasyonên siyasî û da zanîn ku ev di çarçoveya plansaziyekê de tê birêvebirin.
Li Silopiya Şirnexê BDP’ê civîna gel li dar xisti. Hevserokê BDP’ê Selahatîn Demîrtaş, parlamenter Îdrîs Balûken, rêveberên BDP’ê, endamên Însiyatîfa Dayikên Aştiyê û nûnerên saziyên sivîl tevli civînê bûn. Civîn li Navenda Çandê ya Laleşê pêk hat.Di civînê de Demîrtaş axivî û bal kişand ser tecrîda li hemberî Rêberê Gelê Kurd Abdullah Ocalan û operasyonên leşkerî. Demîrtaş, daxuyand ku hikûmeta AKP’ê li hemberî Şirnex û Colemêrgê polîtîkayên taybet dimeşîne.
Demîrtaş wiha dirêjî da axaftina xwe: “Piştî referandûmê wezîrê Karê Derve Beşîr Atalay herêm ziyaret kir. Di ziyarêtên xwe de qala plansaziyên xwe kir. Em dizanin ku ev plansazî çi ne. Niha li Şirnexê hilbijartî nîne. Herî dawiyê plansaziyên xwe yê komkijiya Roboskê pratîzekir. Bê navber li herêmê polîtîkayên taybet dimeşîne. Ev operasyonên siyasî û leşkerî di çarçoveya plansaziyekê de pêk tên.” Demîrtaş, got ku lê gelê Botanê wekî her car dê bi sekna xwe li dijî polîtîkayên şer têkoşîneke mezin bide.

‘ÇI BÛ WE TECRÎD PÊK ANÎ’
Demîrtaş balkişand ser astengkirina hevdîtina Rêberê Gelê Kurd Abdullah Ocalan û wiha got: “Heta duh jî we heyetên xwe dişandin û hevdîtin pêk dihatin. We anî asta diyalog û muzakereyê. We protokolên xwe anîn asta îmzekirinê. Kesên ku we muxatab digirt, we rabû tecrîd li ser pêk anî. Em bêhurmetiyeke wisa qebûl nakin. We çima hevdîtin pêk dianîn. Ji ber ku we dizanî hêz û bandora wî li ser gel heye. Ji ber vê jî we heyetên xwe dişandin Îmraliyê û we protokolên xwe didan nîqaşkirin. Ev çi bû ku hun bi mehane tecrîdê pêk tînin. Hun parêzeran naşînin. Em vê bêhiqûqiyê, şantajê û bê cidiyetê qebûl nakin.”
Demîrtaş di berdwamiya axaftin xwe de diyar kir ku divê hikûmet vê yekê aşkera bike û wiha got: “Divê ev tecrîd demildest bidawî bibe. Gelê botanê bihestiyare. Em li bendene ku hemû gelê kurd bi hestiyarî tevbigere.”
Demîrtaş, bal kişand ser operasyona ku li çiyayê Cudî hatî destpêkirin û da zanîn ku duh ve li Cudiyê pêvçun heye û li gorî agahiyên herêmî tê îdiakirin ku çekên kimyewî tên bikaranîn. Demîrtaş, daxuyand ku divê welatiyên li herêmê li hemberî operasyonan baldar bin û hewcebe berê xwe bidin qadên operasyonê. ŞIRNEX- DÎHA

Ev nûçe 2351 car hate xwendin.
Yên pêsî || ên pistî >>

Nûçeyên Polîtîka